Førdefestivalen feirar 30 år med gjensyn og mangfald. -30 år utan grenser! er temaet for året, og programmet byr på mange fine gjensyn, men også møte med nye spennande artistar, fortel Per Idar Almås. Torsdag 4. april sleppte han sitt første program som direktør for Førdefestivalen.
Førdefestivalen feirar 30-årsjubileum 3.-7. juli 2019. No presenterer festivalen dei norske artistane som skal stå på nokre av dei mange scenene på jubileumsfestivalen. Lista er ei blanding av publikumsfavorittar, som har spelt på festivalen før, og nye namn, som vi gler oss til å høyre i Førde, fortel Per Idar Almås. Torsdag 4. april slepper festivalen heile programmet for festivalen.
Temaet for jubileumsfestivalen er: 30 år utan grenser! Med slagordet ‘Verda kjem til Førde!’ har Førdefestivalen i 30 år vore ein musikalsk smeltedigel mellom fjord og fjell. I alle desse åra har publikum på festivalen fått oppleve musikk og kulturar dei på lag ikkje visst om (eller visste at dei likte). På årets festival blir det gjensyn med publikumsfavorittar - og sjølvsagt møte med nye.
Arne Osland er utnemnd til ny styreleiar for Førdefestivalen frå 2019. Osland er utviklingsdirektør ved UWC Red Cross Nordic i Flekke, og er utnemnd til styreleiarvervet av Sogn og Fjordane Fylkeskommune for ein periode på 2 år. Arne Osland tek over etter Tone Winje. Ho går av etter eige ønskje.
Rom for ord og Førdefestivalen-Folkjazzscena samarbeider om ny litterær konsert. Denne veka kjem Bergsveinn Birgisson, Berit Opheim og Bergsveinn Birgisson til Voss, Balestrand, Vik, Jølster og Fjaler med GLIMESTEINAR - ein nyprodusert litterær konsert. Islandsk diktekunst og livsfilosofi er inspirasjonskjelda.
Den beste konsertarenaen eg har spelt på i heile mitt liv, sa Johan Hedin om Hafstadfjellet, 706 moh, der han og Esbjørn Hazelius hadde konsert laurdag på Førdefestivalen. Slike tilbakemeldingar seier det meste om festivalen som vart avslutta søndag. -Eg er utruleg stolt over å ha fått vere med på dette eventyret som betyr så mykje for Førde og heile resten av fylket, seier Bjørkum.
Den 28. Førdefestivalen hadde Klangen av Norden var temaet, med undertittel - og lyden av verda! Opningskonserten Nordic Sound Folk Orchestra er festivalen sitt største kunstnariske prosjekt nokon gong: 40 av Nordens leiande folkemusikarar, komponistar og solistar framførte nyskriven musikk - og gav publikum ei oppleving dei seint gløymer.
-No er vi der vi skal vere! Liv Judit Straume, regiondirektør BOB er klar i talen når ho skriv namnetrekket sitt på hovudsponsoravtalen med Førdefestivalen. -For oss som er Vestlandets bustadbyggelag er det viktig å vere til stades fleire stader, ikkje minst i Førde. Vi knyter oss òg til ein aktør som står for kvalitet og profesjonalitet.
Den 29. Førdefestivalen vert offisielt opna av kulturminister Trine Skei Grande torsdag 5. juli. Årets festivaltema er Dansen i musikken - musikken i dansen!
Per Idar Almås er tilsett som ny direktør og kunstnarleg leiar ved Førdefestivalen frå oktober 2018. Almås er 37 år og oppvaksen på Stord i Sunnhordland. Han kjem frå ei delt stilling som festivalsjef for kammermusikkfestivalen Gloppen Musikkfest på Sandane, og prosjektansvarleg i Festspillene i Bergen, der han i stor grad har jobba med programmet for born og unge, samt konsertturneen Nordvegen.
Urban Rumba Catalana og lidenskapleg flamenco frå Spania, halling i ny norsk produksjon, heftig tarantella frå Italia, cubansk salsa, dans frå Solomonøyane, Påskeøya, Taiwan, Madagaskar og Papua New Guinea, steppdans frå Canada, bharatanatyam frå India, polska frå Sverige - og Jølstraspringar i Astruptunet; dette er litt av dansemenyen på den 29. Førdefestivalen, 4. - 8. juli i år.
Etter nesten tretti år i Førdefestivalen, takkar Hilde Bjørkum av som direktør etter gjennomføringa av festivalen i 2018. NB! KONTAKTPERSONAR i denne saka: Hilde Bjørkum, direktør – mobil 90 91 99 33 – e-post: hilde.bjorkum@fordefestival.no Tone Winje, styreleiar – mobil 90 77 47 67 – e-post: tone.winje@moss.kommune.no
Dansen i musikken - musikken i dansen! vert temaet for den neste Førdefestivalen, som går av stabelen 4.-8. juli 2018. -Vi vil hylle dansen og dansemusikken både gjennom å presentere den frå scena og invitere til den sosiale dansen for alle, seier direktør Hilde Bjørkum, og ikkje minst få fram sjølve nerven i samspelet mellom dansespelemannen og dansaren - som skaper dansemagi!
Førdefestivalen er kåra til ÅRETS FOLKEMUSIKKARRANGØR 2017. Prisen vert delt ut av FolkOrg til ein arrangør som har evne til å skape interesse og entusiasme for dansen og musikken gjennom gode arrangement, og vart overrekt på bransjetreffet FOLKELARM i Oslo.
Forboden musikk frå Kapp Verde på Hafstadfjellet, 706 moh; ørkenblues frå Mali på elvebreidda ved Jølstra; samba frå Brasil i ein låve oppunder fjellet, nyskapt ‘arkivmusikk’; sylskarpe bulgarske kvinnestemmer i kyrkjerommet; tango direkte frå Buenos Aires, moderne samisk joik og videokunst og ei storstila satsing på nordisk folkemusikk er noko av det publikum i Førde får oppleve i juli!
- Dette har aldri vore gjort før, seier direktør Hilde Bjørkum, når ho presenterer den store satsinga på «Klangen av Norden» som tema for Førdefestivalen 2017. Hovudsatsinga er prosjektet «Nordic Sound Folk Orchestra» eit all-nordisk strykeorkester på førti musikarar og solistar, som skal framføre spesialskriven musikk frå fire nordiske komponistar.
